Германија
Арјен Робен се пензионира

Арјен Робен изненадувачки објави дека става крај на професионалната фудбалска кариера. 35-годишниот холанѓанец ги помина последните 10 години во Бајерн Минхен, а го напушти баварскиот гигант заедно со уште една легенда – Франк Рибери. Се веруваше дека Робен ќе ја продолжи кариерата во друг клуб, но на крајот, холандското крило реши да ги “закачи” копачките.

“Без сомнение ова беше најтешкото решение кое го земав. Решение при кое срцето и умот беа во судир. Љубовта кон играта те убедува дека може да се справиш со целиот свет, но тоа не соодветствува на реалноста. Повеќе не си 16-годишно момче, кое нема претстава како што значи да си повреден. Во моментов сум здрав и во добра кондиција, но како љубител на други спортови, сакам тоа да остане така и во иднина. Затоа одлучив да застанам овде и да се пензионирам”, напиша Робен по повод на оваа негова одлука.

Поранешниот играч на Гронинген, ПСВ Ајндховен, Челси, Реал Мадрид и Бајерн Минхен одигра 606 натпревари и постигна 210 гола во неговата 19-годишна кариера. За репрезентацијата на Холандија одигра 96 натпревари и постигна 37 гола.

Робен се прослави уште на 20-годишна возраст со одличните игри во дресот на Челси. Имаше мала, неславна, авантура во Реал Мадрид, а најдобрите моменти ги доживеа во Бајерн Минхен, со кој освои сè. Со Холандија најголем успех забележа на Светското првенство во ЈАР 2010, каде го освоија второто место.

Напишете коментар

Вашата адреса за е-пошта нема да биде објавена. Задолжителните полиња се означени со *